Header Ads

ເຜີຍແຜ່ແຜນຍຸດທະສາດ ການທ່ອງທ່ຽວອາຊຽນ ປີ 2016-2025



ເພື່ອ​ເຮັດ​ໃຫ້​ ຜະລິດ​ຕະພັນ ​ການທ່ອງທ່ຽວ ຂອງ ສປປ ລາວ ສາມາດ​ເຊື່ອມ​ໂຍງ​ກັບ​ຜະລິດ​ຕະພັນ​ ຂອງ​ບັນດາ​ ປະ​ເທດ​ອາ​ຊຽນ ​ແມ່ນ​ເປັນ​ບັນ​ຫາ ​ທີ່​ສຳຄັນ​ທີ່​ສຸດ​ ສຳລັບ​ອຸດສາຫະກຳ​ການທ່ອງທ່ຽວ​ ຂອງ​ປະ​ເທດ, ຊຶ່ງ​ໃນ​ວັນ​ທີ 20 ມິຖຸນາ 2017 ນີ້, ທີ່​ນະຄອນຫລວງ​ວຽງ​ຈັນ ​ໄດ້​ຈັດ​ກອງປະຊຸມ​ເຜີຍ​ແຜ່​ ແຜນ​ຍຸດ​ທະ​ສາດ​ ການທ່ອງທ່ຽວ​ອາ​ຊຽນ ສຳລັບ​ປີ 2016-2025 ​ໃຫ້​ແກ່​ຜູ້​ບໍລິຫານ ​ແລະ ວິຊາ​ການ​ ຂະ​ແໜງ​ການທ່ອງທ່ຽວ​ຂອງ ກະຊວງ​ຖະ​ແຫລ​ງຂ່າວ, ວັດທະນະທຳ ​ແລະ ທ່ອງ​ທ່ຽວ ​ໂດຍ​ການ​ເຂົ້າ​ຮ່ວມ ​ຂອງ​ທ່ານ​ ສູນ​ ມະນີ​ວົງສ ຫົວໜ້າ​ກົມ​ໂຄສະນາ​ ການທ່ອງ​ທ່ຽວ ທັງ​ເປັນ​ຫົວໜ້າ​ ເຈົ້າໜ້າ​ທີ່​ອາວຸ​ໂສ​ ທ່ອງ​ທ່ຽວ​ອາ​ຊຽນຂອງ ສປປ ລາວ ​ແລະ ທ່ານ Hartmut Janus ຜູ້ຕາງໜ້າ​ອົງການ​ພັດທະນາ ​ລາວ-​ເຢຍລະ​ມັນ, ພ້ອມ​ດ້ວຍ​ພາກສ່ວນ​ກ່ຽວຂ້ອງ​ເຂົ້າ​ຮ່ວມ. ​ເຊິ່ງກອງ​ປະຊຸມ​ດັ່ງກ່າວ​, ເປັນ​ເວ​ທີ​ເພື່ອ​ປຶກສາ​ຫາລືແລກປ່ຽນ ​ເຊິ່ງກັນ ​ແລະ ກັນ ​ໃນ​ຂະ​ແໜງ​ການທ່ອງ​ທ່ຽວ ​ຂອງພວກ​ເຮົາ ​ເພື່ອ​ກຳນົດ​ວຽກ​ບູລິ​ມະ​ສິດ ຂອງ ສປປ ລາວ ​ໃນ​ຕໍ່ໜ້າ.

​ໃນ​ໂອກາດ​ດັ່ງກ່າວ ທ່ານ ສູນ​ ມະນີ​ວົງສ ​ໄດ້​​ໃຫ້​ຮູ້​ວ່າ: ປັດຈຸບັນ​ນີ້​, ອຸດສາຫະກຳ​ ການທ່ອງທ່ຽວ ​ໄດ້​ກາຍ​ເປັນ ​ຂະ​ແໜງ​ເສດຖະກິດ​ ທີ່​ມີ​ການ​ຂະຫຍາຍຕົວ​ ຢ່າງ​ວ່ອງ​ໄວ ​ແລະ ຢູ່​ໃນ​ອັນ​ດັບ​ທີ​ສອງ​ຂອງ​ໂລກ ຫລາຍ​ປະ​ເທດ​ໃນ​ໂລກ ​ໄດ້​ເອົາ​ໃຈ​ໃສ່​ເປັນ​ພິ​ເສດ ຕໍ່​ການ​ພັດທະນາ ​ແລະ ສົ່ງ​ເສີມ​ການທ່ອງທ່ຽວ, ຖື​ເປັນ​ຂະ​ແໜງ​ ເສດຖະກິດ​ຕົ້ນຕໍ ​ເພື່ອ​ພັດທະນາ​ເສດຖະກິດ-ສັງຄົມ​ຂອງ​ປະ​ເທດ ​ເນື່ອງ​ຈາກ​ວ່າການ​ທ່ອງ​ທ່ຽວ​ ເປັນ​ການ​ສົ່ງ​ອອກ​ກັບ​ທີ່, ​ເປັນ​ອຸດສາຫະກຳ​ທີ່​ບໍ່​ມີ​ຄວັນ, ກະຈາຍ​ລາຍ​ຮັບ​ ໃຫ້​ທົ່ວ​ສັງຄົມ ​ແລະ ນຳ​ເງິນຕາ​ ຕ່າງປະ​ເທດ​ ເຂົ້າ​ມາ​ໃນ​ປະ​ເທດ​ ຢ່າງ​ຫລວງ​ຫລາຍ. ຈາ​ກການ​ປະຕິບັດ​ ນະ​ໂຍບາຍ ​ແລະ ການ​ສົ່ງ​ເສີມ​ການທ່ອງທ່ຽວ​ ຂອງ​ລັດຖະບານ ​ແຫ່ງ ສປປ ລາວ ​ຊຶ່ງກ່ອນ​ໜ້າ​ນີ້​ ໄດ້​ກຳນົດ​ໃຫ້​ເປັນ​ຂະ​ແໜງ ​ບູລິ​ມະ​ສິດ ​ແລະ ປັດຈຸບັນ ລັດຖະບານ​ ໄດ້​ກຳນົດ​ມາ​ເປັນ ​ຂະ​ແໜງ​ການ​ເສົາ​ຄໍ້າ​ ຂອງ​ເສດຖະກິດ​ແຫ່ງ​ຊາດ ​ແລະ ວຽກ​ງານ​ທ່ອງ​ທ່ຽວ​ ໄດ້​ມີ​ການ​ຂະຫຍາຍຕົວ​ ຢ່າງ​ວ່ອງ​ໄວຖ້າ​ທຽບ​ໃສ່​ ຂະ​ແໜງການ​ອື່ນ ​ຊຶ່ງ​ເຫັນ​ໄດ້​ຈາ​ກ ການ​ເພີ່ມ​ຂຶ້ນ​ຂອງ​ຈຳນວນ​ ນັກ​ທ່ອງ​ທ່ຽວ ​ແລະ ລາຍ​ຮັບ​ທີ່​ກະຈາຍ​ ໃນ​ທົ່ວ​ປະ​ເທດ​​ແຕ່ລະ​ປີ. ​ໃນ​ປີ 2011 ມີ​ນັກ​ທ່ອງ​ທ່ຽວ ​ເຂົ້າ​ມາ​ທ່ຽວ​ໃນ ສປປ ລາວ ຈຳນວນ 2.723.564 ຄົນ, ປີ 2015 ມີ​ເຖິງ 4.684.429 ຄົນ, ມີ​ອັດຕາ​ເພີ່ມ​ຂຶ້ນ​ສະ​ເລ່ຍ 14,52% ​ເຊິ່ງ​ໃນ​ປີ 2011 ສາມາດ​ສ້າງ​ລາຍ​ຮັບ​ໄດ້ 406 ລ້ານ​ໂດ​ລາ​ສະຫະລັດ, ປີ 2015 ສາມາດ​ສ້າງ​ລາຍ​ຮັບ​ໄດ້​ເຖິງ 725 ລ້ານ​ກວ່າ​ໂດ​ລາ​ລາ​ສະຫະລັດ, ​ເພີ່ມ​ຂຶ້ນ​ຫລາຍ​ກວ່າ 15,6% ​ເມື່ອ​ທຽບ​ໃສ່ 5 ປີ ຜ່ານ​ມາ.

ພ້ອມ​ນີ້, ທ່ານ ສູນ​ ມະນີ​ວົງສ ​ຍັງ​​ໃຫ້​ຮູ້​ຕື່ມ​ວ່າ: ​ແຕ່​ສິ່ງ​ທີ່​ໜ້າ​ເປັນ​ຫ່ວງ​ ສຳລັບ​ພວກ​ເຮົາ​ໃນ​ປັດຈຸບັນ​ນີ້ ​ແມ່ນ​ຈຳນວນ​ນັກ​ທ່ອງ​ທ່ຽວ​ສາກົນ ທີ່​ເຂົ້າ​ມາ​ທ່ອງ​ທ່ຽວ ຢູ່ ສປປ ລາວ ​ໄດ້​ຫລຸ​ງລົງ 10% ຈາກ​ຈຳນວນ 4.684.429 ຄົນ​ ​ໃນ​ປີ 2015 ມາ​ເປັນ 4.226.770 ຄົນ​ໃນ​ປີ 2016. ​ເຊິ່ງນັກ​ທ່ອງ​ທ່ຽວ​ທີ່​ຫລຸດ​ລົງ​ນັ້ນ​ ສ່ວນ​ຫລາຍ​ແມ່ນ​ ນັກ​ທ່ອງ​ທ່ຽວ​ໄທ ​ແລະ ຫວຽດນາມ ກວມ​ເອົາ​ເກືອບ 50% ຂອງ​ນັກ​ທ່ອງ​ທ່ຽວ​ທັງ​ໝົດ​ ທີ່​ເຂົ້າ​ມາ​ທ່ອງ​ທ່ຽວ​ຢູ່ ສປປ ລາວ, ສ່ວນ​ນັກ​ທ່ອງ​ທ່ຽວ​ປະ​ເທດ​ອື່ນໆ ​ແມ່ນ​ຍັງ​ສືບ​ຕໍ່​ເພີ່ມ​ຂຶ້ນ​ຢ່າງ​ຕໍ່​ເນື່ອງ ​ເຊັ່ນ: ​ອົດ​ສະ​ຕາ​ລີ, ​ເຢຍລະ​ມັນ, ລັດ​ເຊຍ ​ແລະ ອີ​ຕາ​ລີ.


ຂ່າວ: ສົມ​ຫວັງ, ພາບ​: ເກດສະໜາ /ຂປລ 

© ລາວລ້ານແຊຣ  | www.laolanshare.com 
___________


No comments

Powered by Blogger.